90 r: und stat starker wider auf Syben mall daz ist mit un(?)iessigkait: mit vergessenheit mit gedanken: mit worten mit werkeren mit verge(?)ung mit not durfft mit plindhait und vergissest deines schopfers: Einen tag oder ein wochen oder ein jar. oder wie lang es ist: Darumb verzag nicht heb an wan du vun...an hebest got ist berait dir zu (?) hellffen: wie dik du auch uber wunden wirst du wi(?)st doch nicht sigloss genant piß daz du den kampff aufgibst und willt nymer streiten aller erst wirstu geurtailt sigloß Nun spricht manig mensch jch ker mich nicht an die horten lere der tugent jch mag es alles nit (mit?) zukumen: got muß mir die genad umb sunst geben jch mag nicht dar nach arbaiten: Also lernt uns nicht die volkumenhait: wer ye zu volkumenhait und zu steter haimligkai gotes kumen ist der muß sich uben an tugenten und mit ernst darnach streiten oder die genad wirt jm nit....für kumet offt einem menschen mit sussigkait ee er wais was tugent ist: daz thut er darumb daz sich der mensch dar nach an...tugenten ube: und thut er daz nit so wirt jm die genad lang nit und kumpt jm die genad fast zu grossem schaden: Es hat nemant so vil genaden daz er die sund sol leicht achten oder clain: wan yetlicher tegliche sund mag todlich werden wan augensting (?) spricht Es ist kain tegliche sund so leicht noch so clain die nit todlich werd so sy dem menschen woll gefellt und jn gelustet da von es sund ist und er umb anders nicht thut dan daz er waiss un gelaubet daz es sund ist und mag auch haubt sund werden begangen do mit won (?) man teglich mit sicherer gewissen thut an willen zu bussen und zu...und jm woll gefellet ymer mer dar jnn zu peleiben und nymer mer rew dar umb zu gewinen Darumb sol man sich ser huten vor teglich sunden wann der mensch kumpet jn die tieff der sunden
---
Keine Kommentare:
Kommentar veröffentlichen